جنحة إتلاف وضرب

السلام عليكم ورحمة الله وبركاته

كنت عايز أسأل عن جنحة إتلاف وضرب. اتعرضت لحادثة عربية. واحدة ست خبطت عربيتي، وجه جوزها ضربني. ادعيت مدني وطلبت تعويض 10 آلاف وواحد جنيه عن كل متهم. الحكم كان حضوري اعتباري. اتحكم على الست بـ 50 جنيه غرامة وتعويض مؤقت ألف وواحد جنيه. واتحكم على الراجل بـ 6 شهور حبس وتعويض مؤقت ألف وواحد جنيه برضه. ولحد كده الموضوع واقف. يعني هم ماستأنفوش. وبرضه ماتنفذش عليهم الحكم.

أنا بصراحة حاليا تايه بين المحامين ومش عارف راسي من رجلي. فيه ناس بتقول الست مالهاش أصلا استئناف لأن الغرامة أقل من 300 جنيه، لكن ليها نقض. نستنى لما يعدي 60 يوم على الحكم وبعدين نجيب شهادة من محكمة النقض إنها لم تطعن، وبعدين نرفع الدعوى المدنية عليها. أما الراجل، فلازم نستنى لحد ما يستأنف. وبكده يبقى الست انفصلت عن الراجل في الإجراءات. وفيه ناس تانية بتقول لأ ماينفعش ينفصلوا عن بعض في الإجراءات لأنهم في نفس الاتهام مع بعض. والست ليها استئناف طالما فيه ادعاء مدني، غير إن الاتنين بيستأنفوا مع بعض عشان هم مع بعض في نفس قرار الاتهام. وناس تالتة بتقول ينفع نرفع الدعوى المدنية دلوقتي ضد الاتنين طالما عدا 10 أيام على الحكم. وناس رابعة بتقول أعلنهم بالحكم بشخصهم وأستنى 10 أيام وبعدين أرفع الدعوى المدنية عليهم هم الاتنين.

فأنا قلت أكيد السادة المستشارين هنا هيفيدوني أكتر ناس.
فهل ينفع الست تستأنف؟ وهل ينفع تستأنف في الشق المدني بس والجنائي لأ؟ واللا بتستأنف الاتنين على اعتبار إن الاتنين في نفس الحكم؟ واللا ايه؟

وهل ينفع نرفع دعوى مدنية دلوقتي على الست وعلى الراجل مع العلم إنهم لم يستأنفوا؟ مش يمكن يتحكم بعدم قبول الدعوى لإقامتها في غير أوانها؟ ولو رفعنا دعوى مدنية وهم استأنفوا حكم محكمة الجنح، كده هتتعلق الدعوى المدنية. فهل ساعتها يكون لي الحق في حضور جلسات الاستئناف واللا الدعوى المدنية اللي أرفعها تحرمني من الحق ده على اعتبار إن المحكمة المدنية هتكون هي المختصة ساعتها؟

أرجوكم الإفادة والرد.

حضرتك عليك باعلان الطرفان بالحكم على يد محضر ثم تباشر بتنفيذ الحكم لكى يتم احتساب مده الاستئناف من يوم العلم بالحكم ثم بعد ذلك تقوم باجراءات التنفيذ على الزوج والزوجه وعندئذ سيقومون بعمل الاستئناف ثم مباشره الدعوى بعد ذلك

المستشار محمد عبد الرازق

عاجز عن شكر حضرتك على المساعدة. بس كان عندي كذه استفسار.
ليه لازم أعلنهم بالحكم وبعدها أنتظر 10 ايام اللي هي مدة الاستئناف؟ مش المفروض المدة تتحسب من يوم الحكم بما إن الحكم حضوري اعتباري؟ يعني أنا كنت فاهم إنه في حالة الحكم الغيابي يتم الإعلان على يد محضر. لكن في حالة الحكم الحضوري الاعتباري فمحامي المتهمين كان موجود، فإيه الحكمة من إعلانهم؟

كمان إزاي أبدأ في إجراءات التنفيذ؟ يعني المفروض الشرطة هي اللي تقبض عليه عشان ينفذ الحكم. أنا ايه المطلوب مني أعمله كإجراءات تنفيذ الحكم؟ لأن حضرتك بتقول "أقوم باجراءات التنفيذ على الزوج والزوجه وعندئذ سيقومون بعمل الاستئناف".

طيب بخصوص الدعوى المدنية، هل أستطيع إقامتها بعد مرور المدة القانونية للاستئناف بعد إعلانه بالحكم (اللي هي 10 أيام)؟ واللا لازم أنتظر لما يستأنف؟

شكرًا جزيلاً لحضرتك مرة أخرى وعذرًا على أسئلتي الكتير.

هو فيه 3 أسئلة حضرتك هيوضحولي الرؤية:
- الحكم الحضوري الاعتباري اللي معايا ده واجب التنفيذ من امتا؟ من تاريخه واللا من تاريخ إعلان المتهم بيه؟ واللا من تاريخ انتهاء مدة الاستئناف؟

- مدة استئناف الحكم الحضوري الاعتباري اللي معايا ده تبدأ امتا؟ من تاريخ الحكم واللا من تاريخ إعلان المتهم بيه؟

- امتا ممكن المتهم يعمل معارضة؟

وعاجز مرة تانية عن شكر سيادتك.